Michel Robert dit de lui...

Lès notes qui s’èvolîn’ dou cayô brut’...


Djèrpène a toudis stî in p’tit vilâdje riyaud muchi ô r’cwè di sès bos,di sès vêrts pachis...

Dissus l’fén dès-anéyes swèssante... nos-èstîn’ ène boune binde, a l’après di sakantès- anéyes nos-èstîn’ dou minme âdje... a l’après di sakantès pavès, nos d’mèrîn’ li minme coron... nos avîn’ souvint raploû didins l’ plin.ne di djeu grandeûr nature qu’èsteut nost’ vilâdje...d’ène fontène a l’ôte...d’in richot ô bî on pèstèleut no-n-âme di viladjwès an djipant nost’jwès d’vikér...

Etou nos-avîn’ chacuin nos dadas...li tèyâte...li dèssin...li musike !

Bén intindu, quazimint tous lès gaviots dou vilâdje d’alîn’ al musike... ô d’zeû dilé Combe...in bâtimint qu’ aveut ayutè li preumîre « escol » di Djèrpène, an 1740. Li mêsse dèl soce Georges Doudelet afroyeut nos djon.nès-orayes ‘yèt nos pôvès-îs, ô solfédje !

Pou dès céns, c’ît in fèstu d’idéye, ène saye...pou d’s-ôtes ça s’ra toute leû vikérîye...

Bernard dou cayô brut... ci vos savèz èyu ç’qui l’ « famîye Nicolas » d’meure, dispû toudis...djusse divant l’ancièn passâdje a niveau an-z-arivant al qwérèle...vos vîrèz ène bén drôle di môjo avou dès pîrès dès cayôs qui bik’nut...dès pîres dou tchafort oudoubén dèl tranchéye qu’aveut stî dis vûdîye pou distoûrnér li t’ch’mwin d’fièr dou cente...adon nost’ soçon Bernard, tout gamin, èsteut d’ja in capâbe, in fèl musucyin ! Mè vos-avèz bô ièsse douwè...sins travayî, broke on-n-arive a rén !Avou Pierre, in soçon pus vî qu’nos-ôtes, il-a trimè dès-eûres, dès djoûs, dès mwès, d’s-anéyes ! Eyèt adon Bernard divénra in vré mêsse dèl trompète !

Al vièspréye dèl niût c’ît in vré bouneûr di choûtér les notes qui s’èvolîn’ dou cayô brut’ !


Cabu
Avril 2015

Lexique : Riyaud...rieur . muchî...cacher.D’mèrîn’...demeurions. raploû...rendez- bî...bièf vous.Ayutè...abrité.Soce...société. Pôvès...pauvres îs-yeux...fèstu d’idéyes...in feu de paille. Disvûdîye...creusée.Soçon...camarade.Mêsse...chef . Vièspréye...crépuscule. C’ît...c’èsteut...c’était Cayô...caillou. S’èvolîn’...s’envolaient